Մեր Արբիտրաժային դատարանը
«Միջազգային արբիտրաժային դատարանը» մշտապես գործող արբիտրաժային դատարան է, որը ստեղծվել և գործում է միջազգայնորեն ընդունված սկզբունքներին համապատասխան՝ առևտրային /պայմանագրային/ վեճերի պրոֆեսիոնալ, արագ և արդարացի լուծման նպատակով: Միջազգային արբիտրաժային դատարանն ակտիվ գործունեություն է ծավալում 2020 թվականից:
Միջազգային Արբիտրաժային դատարանի արբիտրները հանդիսանում են բարձր հեղինակություն և փորձ, մասնագիտակոան խորը գիտելիքներ ունեցող իրավաբաններ, որոնք ունեն մեծ փորձ նաև վեճերի արբիտրաժային լուծման բնագավառում: Արբիտրաժային դատարանի նախագահն է հանդիսանում Նաիրա Մարգարյանը ։
Միջազգային Արբիտրաժային դատարանում կարող են քննվել առևտրային, իսկ օրենքով նախատեսված դեպքերում նաև ոչ առևտրային հարաբերություններից բխող այն վեճերը, որոնց լուծումը կողմերը վերապահել են Արբիտրաժային դատարանին` այդ մասին կնքելով արբիտրաժային համաձայնություն: Առևտրային են համարվում քաղաքացիական իրավահարաբերություններից առաջացող առևտրային բնույթի բոլոր վեճերը:
Արբիտրաժային դատարանի լուծմանը կարող են հանձնվել նաև աշխատանքային վեճերը, եթե աշխատողի և գործատուի միջև կնքվել է արբիտրաժային համաձայնություն, կամ կոլեկտիվ պայմանագրով նախատեսված է վեճն արբիտրաժին հանձնելու հնարավորություն։ Ընդ որում, աշխատանքային վեճերը Արբիտրաժային դատարանի լուծմանը կարող են հանձնվել ՀՀ աշխատանքային օրենսգրքով սահմանված ժամկետներում։
Արբիտրաժային դատարանի լուծմանը կարող են հանձնվել նաև ամուսինների ընդհանուր գույքը բաժանելու հետ կապված վեճերը՝ ամուսինների փոխադարձ համաձայնությամբ կնքված արբիտրաժային համաձայնությունների հիման վրա, եթե ամուսինների ընդհանուր գույքի բաժանումը չի շոշափում երրորդ անձանց շահերը: Ընդ որում, ընդհանուր գույքը բաժանելու հետ կապված վեճն Արբիտրաժային դատարանում լուծելու հնարավորությունը կարող է նախատեսվել նաև ամուսնական պայմանագրով:
Արբիտրաժային գործընթացը հիմնվում է կողմերի արբիտրաժային համաձայնության վրա, որը կարող է ամրագրվել ինչպես առանձին համաձայնագրով, այնպես էլ կողմերի քաղաքացիաիրավական (առևտրային) պայմանագրում` արբիտրաժային վերապահման տեսքով:
Միջազգային արբիտրաժային դատարանում վեճերը լուծվում են արագ, առանց անհարկի ձգձգումների և ծախսերի, որպես կանոն մեկ ամսվա ընթացքում:
Միջազգային արբիտրաժային դատարանը օրենսդրությունում կատարված փոփոխությունների ուժով իրավունք է ստացել մինչև հինգ միլիոն ՀՀ դրամ կամ դրան համարժեք արտարժույթով գումարներ բռնագանձելու վերաբերյալ իր կողմից կայացված վճիռների հարկադիր կատարման համար հատուկ էլեկտրոնային կապուղու միջոցով հաղորդագրություն ուղարկել ԴԱՀԿ ապահովող ծառայություն՝ ապահովելով վճիռների հարկադիր կատարումը։ Այդ գործերով այլևս բացակայում է ՀՀ պետական դատարաններից կատարողական թերթեր ստանալու անհրաժեշտությունը և վճիռները կամովին չկատարվելու դեպքում դրանք հարկադիր կատարման են ներկայացվում անմիջականորեն Միջազգային արբիտրաժային դատարանի կողմից։
Հայաստանի Հանրապետությունը 1997թ. միացել է 1958 թվականի հունիսի 10–ին Նյու Յորք քաղաքում ստորագրված` «Օտարերկրյա արբիտրաժային որոշումների ճանաչման և կատարման մասին» կոնվենցիային: Կոնվենցիայի ուժով Միջազգային Արբիտրաժային դատարանի վճիռները ենթակա են ճանաչման և կատարման Նյու Յորքի կոնվենցիայի մասնակից բոլոր պետություններում, ինչը ևս մեկ առավելություն է պետական դատարանների վճիռների նկատմամբ:
Ձեր վեճերի լուծումը վստահելով Միջազգային արբիտրաժային դատարանին կխնայեք Ձեր ժամանակն ու միջոցները և կստանաք այդ վեճերի արդարացի, արագ և բարձրորակ լուծում: